Þökk sé Blámanninum og trukkalessunni.

Þá hefur fyrsta skólavikan runnið sitt skeið á enda og gamlinginn enn á lífi og að mestu laus við hjartsláttartruflanir.

Þetta byrjaði allt á kynningu á miðvikudagsmorgni og svo hófst kennslan samkvæmt stundarskrá strax eftir hádegið. En áður en kennslan hófst var liðinu raðað í grubbur og er Bóinn nokkuð ánægður með sína grúbbumeðlimi - fjölbreytnin í fyrirrúmi. Grúbban samanstendur af 4 Dönum, 1 Kasakstana, 1 Súdanmanni og 1 gömlum Íslendingi.

Bóinn er líka í skýjunum yfir því að vera ekki öldungurinn í grúbbunni og er m.a.s. í 3ja sæti á þeim lista (geri aðrir gamlingjar betur) því að bæði Blámaðurinn frá Súdan og trukkalessan danska eru eldri en Íslendingurinn. Það kom Bó reyndar í opna skjöldu þegar upp komst að trukkalessan var alls ekki trukkalessa - bara venjulegur trukkur, gift með 3 börn. Blámaðurinn og Bó eru orðnir mestu mátar og sést hefur til þeirra "hæfævast" í miðbæ Álaborgar.

En annars hefur þetta bara farið nokkuð rólega af stað, t.d. var bara byrjað á grunnreglum stærðfræðinnar - svona af tillitsemi við gamla Íslendinga, Kasakstana og fl. vandræðapésa. Og fyrsti ensku tíminn fór næstum allur í kynningar, þ.e.a.s. nemendur voru látnir standa upp og segja eitthvað frá sér. Það var einmitt þar sem trukkalessan fór inn í skápinn sinn.

En allavega þá hefur þetta farið vel af stað og vonandi að gamlinginn komist klakklaust í gegnum þetta.

Yfir og út.

 

 

Stórkostlegt!!!!

Já það er vægast sagt mikil gleði ríkjandi hér á bæ.

En nú hefur það gerst að KR-ingarnir mínir eru búnir að yfirgefa botninn og ég trúi því að þangað liggi leið þerra ekki framar. Þetta er eitthvað sem öll lið þurfa að ganga í gegnum einhvern tíman á ferlinum og þetta snýst allt um rétta tímasetningu.

KR-ingar lögðu Víkinga að velli í gær 0-1 og þar með var botnsætið kvatt fyrir fullt og allt.

Áfram KR!

Rauða hættan nálgast

Já það styttist svo sannarlega í að gamli Rauður geti látið ljós sín skína á breiðstræti Baunalands.

Ef allt fer að óskum sameinumst við að nýju á hafnarbakka einum í Århus á mánudaginn kemur.  Planið er að fara snemma af stað því að mikil eftirvænting er í hópnum og sumir hreinlega að missa legvatnið í öllum spenningnum. Hann mun síðan nýtast vel á næstunni og sér í lagi um næstu mánaðamót ef þau áform sem nú eru í gangi ganga eftir.

Þú ert langbestur, gamli vinur.

 

Íslandsferð

Þá erum við bara mætt aftur hingað til DK eftir vel heppnaða Íslandsferð.

 Bóinn var nú ekki neitt sérstaklega spenntur fyrir Íslandsferðinni svona fyrirfram en það rættist sko heldur betur úr henni. Bóinn var svartsýnn á veðurfarið á Íslandi - að það yrði rok og rigning allan tímann og á meðan væri sól og hiti í DK. Og svo var hann eitthvað hræddur um að erfingjarnir yrðu erfiðir og hálf ruglaðir á öllu þessu róti. En annað átti eftir að koma á daginn.

 Sjálft ferðalagið til Íslands gekk vonum framar og erfingjarnir voru eins og blóm í haga alla leiðina, svo ljúf og góð,og þá erum við að tala um 5 tíma lestarferð, 1 tími á Kastrup, 3 tímar í flugi og 1 tími í bíl að lokum, allt á sama deginum. Svo stóðu þau sig ótrúlega vel, miðað við allt rótið og ruglinginn,  meðan á dvölinni á Íslandi stóð.

Veðurdæmið er eiginlega bara ótrúlega fyndið. Það var einmitt búið að vera mjög gott og hlýtt vor hjá okkur hér í DK, en 2 dögum fyrir Íslandsferðina dró fyrir sólu. Það var þó áfram hlýtt, um 20 stig, og það rigndi ekki mikið. Svo þegar til Íslands var komið þá bara tók á móti okkur þetta frábæra veður ( á Íslenskan mælikvarða), sól og 16-18 stiga hiti. Það má segja að þetta veður hafi staðið næstum allan þann tíma sem við vorum á Íslandinu - ótrúlegt. Á sama tíma bárust okkur þær fréttir frá DK að allt væri þar að rigna í kaf og beljur og annar búfénaður hefðu fokið á haf út, svo mikil voru lætin. Bóinn hefði því átta að eyða minni tíma og orku í að bölsótast yfir væntanlegri Íslandsferð, þar sem rökin hans fyrir kyrrsetustefnunni í DK, rigndu og fuku á haf út þegar öllu var á botninn hvolft. Semsagt vel heppnuð Íslandsferð að baki og ískaldur bjórinn, nei ég meina raunveruleikinn, tekinn við.

Svo nú styttist í skólann og Bóinn er farinn að fá nettar hjartsláttartruflanir ásamt því að þeim skiptum sem hann teflir við páfann fer fjölgandi dag frá degi. Fyrsti skóladagur er s.s. miðvikudagur, 15. ágúst og hefst hann með kynningu um morguninn og svo hefst kennsla samkvæmt stunaskrá eftir hádegið. Skólaárinu lýkur svo um mánaðamótin Júní/Júlí árið 2008. Magnað hvað maður er alltaf að koma sér í ný og ný vandræði.

Sjáum hvað setur.

Pifsa og pefsi og Kimi góður

Góður var dagurinn. 

Rólóferð í bítið með börnunum og svo þetta fína bakkelsi í hádeginu. Önnur rólóferð og F1. Grasið slegið í garðinum (2 fullir ruslapokar af grasi). Síðan var ferðinni heitið í matarboð hjá góðfjölskyldu einni í Mos og þar var að sjálfsögðu boðið upp á pifsu og pefsi að hætti húsfreyjunnar. Svo heim með liðið, börnin í háttinn og klessurnar í hnipri fyrir framan imbakassann.

Góður dagur að baki.

Thierry Henry verður spilandi þjálfari KR!!!

KRingar ætla að snúa við blaðinu, svo um munar, á íslandsmótinu í knattspyrnu. Nú er það staðfest að Teiti Þórðasyni hefur verið sagt upp störfum sem þjálfari liðsins og í hans stað hefur verið ráðinn, enginn annar en sjálfur Thierry Henry fyrrum leikmaður Arsenal.

Thierry verður spilandi þjálfari og mun þetta næsta víst bæta úr markaþurrð vesturbæjaliðsins. Liðinu hefur gengið illa að skora og hafa mörg dauðafærin farið forgörðum á yfirstandandi tímabili. Það vandamál er nú örugglega úr sögunni.

Eins og fram kom í fjölmiðlum í gær var Thierry á leið til Barcelona og var þar um leikbrellu KR-stjórnarinnar að ræða, en þeir vildu halda þessu leyndu þar til samningar hefðu verið undirritaðir. Það hefur nú verð gert og hefur Thierry gert 3ára samning en getur þó yfirgefið liðið, falli það úr úrvalsdeildinni á þessum tíma. Það verður þó að teljast ólíklegt eftir þetta snilldar útspil KRinga.

Það verður erfitt að horfa á eftir Thierry yfirgefa Arsenal en hann verður auðvitað að hugsa um eigin hag og þetta var hans val. Haft var eftir honum að hann og konan hans hafi lengi haft þann draum um að geta sest að á Íslandi einn daginn og sá draumur sé að rætast núna.

KR-stjórnin hefur neitað að gefa upp kostnaðinn sem þessu útspili fylgir en þeir hafa þó sagt að þetta sé peningana virði, hvað svo sem þeir meina með því.

Áfram KR!!!

 

Gott í kroppinn!!

Einhver sagði eitt sinn að maður ætti ekki að borða vini sína. Það er margt til í þessari skipun en ég gerði það nú samt núna í hádeginu og ekki bara einn heldur tvo.

Ég get nú alveg játað að ég finn fyrir samviskubiti en þeir voru bara svo freistandi að ég réð ekki við mig. Og svo var ég líka bara svo svangur.

Ég vona bara að þið dæmið mig ekki af þessu því að ég er ekki vondur maður að eðlisfari, er reyndar góður maður með eindæmum. En allir hafa sína galla og veikleika og ég var sigraður í þetta skiptið af veikleikum mínum.

Þið eruð kannski farin að velta því fyrir ykkur um hvað í andskotanum ég er að tala en þið sem þekkið kauða vitið það auðvitað. En fyrir ykkur hin þá er ég að sjálfsögðu að tala um góðvini mína, sem bera reyndar sama nafnið, en það er Mc Donalds ostborgari.

Ljúfur biti þar á ferð.

Skrapp í heimsókn suður fyrir ælu.

Ég fór í heimsókn til vinkonu minnar snemma í morgun þrátt fyrir að vilja það alls ekki. Þetta kom mér gersamlega í opna skjöldu, að þurfa að rjúka þangað með engum fyrirvara. En skýringarnar eru smátt og smátt að koma upp á yfirborðið, þ.e. afhverju ég var sendur þangað.

Ímyndið ykkur að settar séu í sömu skál eftirfarandi vörur :

Pastaréttur (rjómaostur,sveppir skinka, pastaskrúfur,paprika o.fl.), 2 glös af rauðvíni, eitt glas af vatni, eitt glas af kóki, einn kaldur bjór, íspinni með súkkulaðidýfu, maribu-daim súkkulaðiplata og já ætli þetta sé ekki komið.

Svo er þessu öllu bara hrært saman og síðan borðað/drukkið með bestu lyst.

Útkoman er stutt (vonandi) heimsókn suður fyrir ælu snemma næsta morgun, eftir þrátt fyrir allt, góðan nætursvefn.

En ég held að ég sé um það bil að yfirgefa staðinn núna, léttur og flottur, (þyrfti kannski að skella mér í sturtu) en vinkona mín verður þarna eitthvað áfram hef ég frétt. Vonandi fer hún nú samt að losna þaðan því þetta er ekki besti staðurinn til að vera á.

 

Nammidagur í dag!!!

Í dag er laugardagur, jafnt besti og versti dagur vikunnar að mínu mati.

 Í dag ætla ég að borða mikið nammi, kex og fl. gott og í kvöld ætla ég svo að borða yfir mig af snakkréttinum fræga. Hljómar allt mjög vel ekki satt? "Besti dagur vikunnar" virðist eiga vel við hér.

 En svona 15 mín eftir að síðustu agnirnar af snakkréttinum hafa verið sleiktar upp úr mótinu og þeim troðið ofan í minn netta maga, þá kemur fram vanlíðan mikil. Nú tekur við c.a. klukkutími af blóti og stunum og samviskubit gerir vart við sig. "Versti dagur vikunnar" á svo sannarlega við hér.